Iran student don naked herself for protest bicos of strict hijab dress code

One female student for university wey dey Tehran naked come out for protest afta security officers for campus dey harass am bicos of her hijab.

Videos wey dey circulate well-well for social media show di student wey dem no sabi her name dey sit down outside campus wey she dey wear only her underwear while security guards dem dey surround am.

Anoda video dey show am dey waka around campus wit just her bra and pant and shoes while oda students wey dey shock dey film am wit dia mobile phones.

Her resistance start afta dem confront am inside Azad University science and research centre for Saturday, wen security forces attack di student bicos she no wear headscarf.

As dem tear her clothes, she come decide to comot di rest of her clothes as protest.

According to Iranian student social media report, plenty witnesses don confirm say dem carry her go detention afta dat.

Video wey show security officers carry am from di campus.

Officers dey forcefully hold student 

About 10 security guards dem catch for video as dem dey forcefully bundle di young woman enta inside motor.

Di video dey show say one group of officers dey overpower am before dem carry am go.

“Oh God, how many of dem dey attack just one pesin?”

One pesin wey dey look talk. “I no fit believe wetin I dey see,” anoda pesin talk.

“Around noon, for di entrance of di faculty, I see one girl dem dey grab and dey carry forcefully by security men dem,” one witness talk am.

“She no dey wear headscarf. Dem reach di security building near di entrance, wia one male and one female security guard grab am and try to carry am enta di office wit force.”

“She dey resist, and dem tear her hoodie from her body, e come make am vex and she come comot di rest of her clothes.”

“She shout for dem wit anger and comot her trouser come sit down outside di campus for small minutes and di officer dey vex more and more.”

“I no fit see plenty but, small minutes afta she start to waka, plenty plain-cloth officers ambush am and force am enta car.”

Student dem say she get injury during di arrest, including serious head trauma afta dem hit am for di car.

Witnesses talk say blood dey show for di ground.

Girl of Science and Research

Di video don dey widely share for Iran and di student don already become powerful symbol of resistance, wey dey draw nationwide attention under di hashtag: “Girl of Science and Research.”

“If courage get face,” one user post for X wit di girl picture. “Dat brave girl na my leader,” anoda pesin user write.

Amir Mahjoub, di director of public relations for di university, talk say she don transfer go “police station” and claim say she dey under “severe mental stress and dey suffer from psychological disorders.”

Di tori, wey dey affiliated wit di university, also claim, citing “official and unofficial sources” say di student get “severe psychological and mental issues.”

Di report add say, afta dem hand her over to di police by university security staff, she don dey hospitalized for psychiatric facility.

Wia she dey and how she dey nobody sabi

Dem neva get any new information about wia she dey or how she dey.

Amnesty International don urge Iranian authorities make dem release di girl “immediately and unconditionally”.

No be di first time wey officials and media wey dey wit di Islamic Republic don accuse protesters say dem get “mental disorders” and carry dem go psychiatric institutions by force.

Di protest dey remind pipo of earlier acts of civil disobedience, especially dat one wey “Vida Mavahed, wey dem dey call di girl of Enghelab Street.”

Dat show of defiance get international attention for 2017 wen one woman comot her headscarf and hold am high for di tip of stick while she dey stand protest against di mandatory hijab.

Observers don draw parallels between di demonstrations, dey see am as key moments for Iranian women struggle for pesinal freedoms.

Afta September 2022 wey dem take Mahsa Amini custody wey be 22 years old, and di protests wey follow, Iranian universities don face plenty repression and control.

Di protests lead to civil disobedience by Iranian women and girls against di mandatory hijab.

New stricter laws don come. All women for Iran suppose cover dem hair wit headscarf and wear loose trousers under dem coats wen dem dey public, but plenty Iranian women don show for public witout head coverings.

Iranian police and security forces don intensify di enforcement of di rules.

New bill wey dey go through Iran parliament go make di regulations wey govern how women and men fit dress for public harder, but di authorities don start to enforce am before dem approve am officially.

Article 50 of di bill talk say anybody wey dem catch “naked, semi-naked, or wear cloth wey dem no gree for public” dem go arrest am sharp sharp and dem go hand am over to di judicial authorities.

Di bill sef dey bring gender segregation for plenty places, like universities, hospitals, educational and administrative centres, parks and tourist sites dem.

Pipo wey go break di new rules go face ban from leaving di country and using social media for six months to two years.

“Dis girls go one day bring down Ayatollah Ali Khamenei, Iran future belong to free women, no be di mullahs,” one student talk am.

“Dem go remember her as hero for plenty women,” she talk about di girl wey protest for Saturday.”

“Afta dis regime fall, her picture go dey everywia for Iran, like Mahsa Amin’s and plenty more.”

For Diaspora Digital Media Updates click on Whatsapp, or Telegram. For eyewitness accounts/ reports/ articles, write to: citizenreports@diasporadigitalmedia.com. Follow us on X (Fomerly Twitter) or Facebook