Netanyahu don confirm say e approve di Lebanon pager attacks wey kill 40 pipo and injure 3,000 pipo

Israel don confirm say prime minister Benjamin Netanyahu give di green light for di deadly pager attacks for Lebanon and Syria for inside September.

Pagers don explode for di two countries, wey kill almost 40 pipo, including two children, and e don wound over 3,000 pipo just days before Israel increase im war against Hezbollah for southern Lebanon.

Dem blame di explosions on Israel, but di Netanyahu government no bin gree talk weda dem dey involved or not.

Hezbollah talk say di explosions na di “biggest security breach” wey don happen for almost one year of renewed wahala with Israel.

“Mr Netanyahu confirm on Sunday say e don give green light for di pager operation for Lebanon,”

im spokesperson Omer Dostri tell AFP. Mr Netanyahu talk during cabinet meeting on Sunday say di pager operation and di elimination of Nasrallah happen even though senior officials for di defence establishment and dem wey dey responsible for am for di political level no gree, di times of Israel report.

Hassan Narallah, di leader of Hezbollah, don die for Israeli airstrike wey happen for one building complex for di Lebanese capital, Beirut, for late September.

Mr Netanyahu statement be like say na jab for Yoav Gallant, wey di prime minister sack as defence minister on Tuesday.

Bicos of significant gaps and one “crisis of trust” wey dey affect Israel war for Gaza and Lebanon.

Di confirmation from Israel come just few days afta Lebanon labour minister talk say him country dey file complaint against Israel for di UN labour organization bicos of di pager blasts.

Moustafa Bayram talk say e travel go Geneva to formally file di complaint against Israel for di International Labor Organization.

Mr Bayram talk say di casualties dey plenty past wetin dem first report.

“More than 4,000 civilians don fall bitwin martyrs and injured and wey dem don maim for just few minutes bicos of dis attack,” e talk.

“Dis kind method of warfare and conflicts fit open door for plenty pipo wey dey run from international humanitarian law to take dis kind warfare.”

E no sabi wetin go be di outcome of di complaint, di minister talk, but “at least we don raise our voices to talk and warn against dis dangerous approach wey dey strike human relations and dey lead to more conflicts.”

Meanwhile, Taiwan on Monday talk say no Taiwanese citizens or companies dey involve for di production of pagers wey explode for Lebanon.

Security sources don talk before say di pagers carry di name of Taiwan-based Gold Apollo, one company wey don talk say dem no make am.

Taiwan government don talk before say di pagers no come from di island.

“No evidence dey wey show say any local manufacturers or individuals don be accomplices for di explosions, wey go violate di Counter-Terrorism Financing Act, or dey engage for any oda illegal activities,” di prosecutors talk for statement as dem close di case.

Israeli attack for Lebanon on Sunday kill at least 23 pipo, including seven pikin, for di village of Aalmat wey dey north of Beirut, far from di areas for east and south wey Hezbollah get strong presence.

Dem talk say no Israeli evacuation warning dey.

Israel military claim say dem hit one Hezbollah site wey dem dey use store weapons and di strike dey under review.

Israel don dey fight Gaza for one year, e don kill almost 43,000 Palestinians and don wound over 100,000, according to di health ministry for di territory wey Hamas dey run.

Di attack on Gaza start afta Hamas attack southern Israel for October last year, wey kill around 1,200 pipo and carry more than 250 pipo go as hostage.

Since den, Israel don start to dey attack Lebanon too and don bomb Syria and Iran.

For Diaspora Digital Media Updates click on Whatsapp, or Telegram. For eyewitness accounts/ reports/ articles, write to: citizenreports@diasporadigitalmedia.com. Follow us on X (Fomerly Twitter) or Facebook