Dem kill 24 pipo and detain 1,200 pipo for di #EndBadGovernance protest- Amnesty International

Human rights group Amnesty International don accuse Naija police say dem dey use too much force against pipo wey dey demonstrate during di #EndBadGovernance protests wey happen between August 1 and 10.

Di protests wey happen for everywhere for di country, na bicos of plenty frustration over harsh economic condition.

Demonstrators dey call for reforms and beta governance, but di protests sabi turn violent for some places.

For statement wey dem release on Wednesday, Amnesty International talk say di police response to di protests involve use of excessive force, wey cause di death of plenty pipo.

Di statement talk say, “Naija police use excessive force against protesters during di nationwide #Endbadgovernance.”

Demonstrations wey happen between 1-10 August, don kill at least 24 pipo for states like: Borno, Kaduna, Kano, Katsina, Jigawa and Niger, na wetin Amnesty International talk for briefing wey dem publish today.

“Bloody August: Naija Government’s Violent Crackdown on #Endbadgovernance Protests” dey show how dem take dey use violence against peaceful protests wey dey against plenty corruption and economic wahala.

Dem wey die include 20 young pipo, one older pesin and two children.

In all cases, police don shoot di victims, dey fire live bullet for close range, often for head or tor so, e mean say officers dey shoot to kill.

Two survivors get injury afta police shoot dem for arm and leg, odas dey suffocate bicos of di way dem dey use tear gas anyhow.

“Pipo for Naija don see wahala wey no get sense as security personnel dey fire live bullet for peaceful protest.”

“Di number of pipo wey don die fit pass 24 bicos of di way di authorities dey try cover am up atrocities.”

“Peaceful protest over di government policies don turn mata of life and death for Naija,” na wetin Isa Sanusi, Director of Amnesty International Naija talk.

“Naija authorities suppose hold police and oda security agencies responsible for using deadly force on pipo wey no be imminent threat to life.”

“E dey shock say police don dey deny wetin dem do despite public evidence wey show say dem wrong, and dis one dey show say dem no get respect for human life.”

“President Bola Tinubu suppose set up independent and impartial investigation for human rights violations wey happen during di#Endbadgovernance protests.”

For Kano, 12 pipo don die for Rijiyar Lemo and Kofar Nasarawa.

For Jigawa state, 3 pipo don die for Hadejia, while 1 pesin don die for Kofar Sauri, Katsina state.

For Kaduna state, soldier don kill one minor for Zaria while police don kill one pesin for Kaduna.

For Maiduguri, 3 pipo don die for A.A. Kime Filling Station for Bolori Junction.

For Niger state, at least, 3 pipo don die along Abuja-Kaduna Expressway.

Between 12-17 August 2024, Amnesty International carry out field research for Kano, Katsina, and Jigawa states.

Dem gather evidence wey include videos and photographs, as well as accounts from eyewitnesses, medical workers and victims’ relatives, friends, and acquaintances wey dey ground.

“Eyewitnesses tell Amnesty International for Kano, Dutse, Katsina, and Minna say di protests dey mostly peaceful wen dem.”

“E start for morning of 1 August, but di mood change sharp wen police come attack di protesters by firing live bullet and tear gas.”

“Di way police take use force too much against di protesters no follow international human rights standard, wey include di UN Basic Principles on di Use of Force and Firearms by Law Enforcement Officials.”

“Dem wey show support for di protests for social media come dey attack and plenty of dem dey arrest anyhow either by di police or di Department of State Services (DSS).”

“Khalid Aminu dem arrest am by DSS for Kaduna wen dem dey protest.”

E tell Amesty International say: “Dem don torture me for over 60 days and di torture start from di time dem arrest me.”

“Di DSS pipo beat me and other protesters with stick and iron cable.”

“Dem pour water for my body. I never fit recover well from all dis wahala.”

“Michael Adaramoye (wey dem sabi as Lenin) dem detain am for two months bicos e be part of di protest for Abuja.”

“Even with plenty evidence, wey include eyewitness accounts, videos, medical records, testimonies from parents of victims and survivors, plus photographs.”

“Police still dey deny say dem no get hand for di killings, dey call am ‘fake news’ or say na ‘unknown gunmen’ do am.”

Di Naija Police Force wey dey deny say dem kill protesters na serious mata wey dey make trust dey waka, dey make impunity dey continue, and dey make violence dey increase.

“E still dey add to di pain of parents wey lose their loved ones.”

Di way dem dey harsh on di #Endbadgovernance na clear sign say Naija authorities no sabi respect di right to gather and talk freely.

From how dem dey block protesters from certain places for Abuja, Lagos and Port Harcourt to how dem dey attack journalists, Naija police don show again say nothing don change for how dem dey treat human rights.

“International law clear say security forces wey dey police demonstration no suppose use firearm against protesters unless dem dey pose immediate threat to life or serious injury, and only if no other way fit stop that threat.

Law enforcement agents no suppose ever use firearm to scatter demonstration, even if e turn violent.

Firearm no suppose be used as tactical tool to manage demonstration.

“Di only rare exception na to save another life.”

Naija authorities suppose investigate well, by demself, no bias, clear, and make e dey effective all di claims wey dey talk say human rights don violate and abuse wey dey connect to di #EndBadGovernance protests.

Dem suppose find dose wey dem suspect say na dem cause am and carry dem go court for fair trial.

“Naija authorities gatz stop dis cycle of impunity and make sure say justice go reach victims and survivors.

Deadly crackdowns on peaceful protests gatz end make dem follow Naija national and international legal obligations.”

For Diaspora Digital Media Updates click on Whatsapp, or Telegram. For eyewitness accounts/ reports/ articles, write to: citizenreports@diasporadigitalmedia.com. Follow us on X (Fomerly Twitter) or Facebook